Chapter 11 ~ Who's give me a Christmas Card??

第十一章 ~ 聖誕卡移魂

            其實我0地差唔多到聖誕節先放暑假﹐之後你上高中個暑假就開始放長D直到上大學。所以當時同學們都會有送聖誕卡俾人。講老實說話呀﹐到而家我都為一張聖誕卡而煩惱。係點﹖一陣間睇啦。

            其實一張卡都冇咩0野啦。如果有一張你鐘意0既人俾張卡你﹐但係左睇右睇都唔似係佢送。攪到你唔知點咁﹐我就係咁0既感覺呀。

            今日有唱歌集會。其實係全校學生去玩大型卡拉OK﹐但係唔可以自選歌曲﹐而大部份都係唱D悶歌(應該講係舊歌﹐佢識我但我唔識佢0個隻) ﹐都有D流行曲﹐不過小啦。

            今日食完晏之後就去禮堂搵位坐﹐我0地坐好(其實已經安排好邊班就坐一度地方﹐今次安排坐頭三行0既地方)之後見到位班D男仔就坐0係我0地前面0個行。唱到中間0個陣唱到一首歌叫做”Every I Do, I Do It For You”( 我記得好似一套電影叫做Robin Hood羅賓漢0既主題曲)。唱呢首歌0既時候我聽到一把聲唱得零舍大聲﹐而呢把聲係男聲0黎﹐我諗把聲應該係坐0係前面0個行0既男仔傳0黎。唔知係邊個呢﹖佢坐我前面邊睇到啦。聽聽0下佢唱得幾好聽喎。

            差唔多唱完呢個唱歌集會呀。大家都開始分班返課室﹐到我0個班可以返去呀﹐我發現原來坐0係我前面0既人係B喎。真係估唔到係佢呀﹐佢唱歌都算係好聽呀﹐應該話差唔多啦﹐真係。呢件事我冇話俾班同學聽﹐費事俾佢0地話我留意佢啦。

            差唔多到聖誕節﹐又要準備寫聖誕卡俾人呀。我媽咪買0左4至5盒聖誕卡俾我﹐大概40至50張卡啦。咁我冇咁多同學要寫聖誕卡﹐不過揀卡俾人都要時間。又唔知0係聖誕卡寫咩0野好﹐淨係寫“聖誕快樂” 好似小得制﹐但係又唔知寫咩﹐真係矛盾。

            揀完寫完0係時候派俾人呀。今日玀D聖誕卡返學校。返到課室﹐去到自己個位擺低D0野0個陣﹐我見到班台灣男仔(包括B)同幾個外國男仔傾計。咁我冇咁八﹐所以冇咩點留意佢0地講咩0野直至到我聽到呢一句﹕

「B﹐你鐘意邊個呀﹖」其中一個外國男仔問B

            唔知B係咪驚俾人知咁﹐佢好細聲講俾佢0地聽。而我B八卦心態又返0黎呀﹐所以我咋第經過佢0地身邊行去閱讀閣玀書睇。當我經過0個陣佢0地已經講完之後就開始四散返埋位。0車﹗聽唔到添。但正當我好失望而回(返自己個位)0既時候﹐頭先0個個問B問題0既男仔經過我身邊0既時候留低呢句說話﹕

「嗚~~~~~miki。」

            佢個樣都幾衰呀﹐重帶D不可相信0既感覺添。當然﹐我係好唔明白佢做咩啦。唔通B講0個個人係我﹖唔會0卦﹗

            又到小息呀﹐我就將呢陣事話0左俾佢0地聽。

「當時我都0係度喎﹐點解我唔知0架。」JuJu講

「你好似做0野唔知去0左邊呀。」我講

「依我0黎睇﹐佢~~~好似鐘意你喎。」m&m講

「唔會0卦﹗」我講

「有可能喎。」英姐講

「如果0個個男仔用咁0既話氣同你講﹐十成十都係真呀。」JuJu講

「咁~~~佢真係~~~咩我呀﹖」我好驚訝地講

「你好唔信喎﹖」m&m講

「咁樣係正常0架﹐如果有一日有人話俾你聽有人鐘意你﹐你都唔信啦。」Cynthia講

「咁又係。miki你D反應都好正常0既。」m&m講

「我當然正常啦﹐真係。」我講

「咁~~你打算點呀﹖」JuJu問

「咩點呀﹖我諗我會當冇事發生過喎。」我講

「小姐呀﹐你點可以當冇事發生過0架﹐你真係。」英姐講

「咁我可以點喎。走去同佢講我都鐘意佢之類0既0野呀。咁如果佢講0下就算咁點呀﹖知道就算啦。」我講

「又係喎﹐如果佢講0下咁miki咪好慘。」Cynthia講

「我做咩好慘呀﹖」我問

「總言之慘啦。」英姐講

「我都唔明﹐慘咩呢﹖」我問

「唔知好過知呀﹐miki。」JuJu講

            就係咁﹐一個小息時間就咁過去呀。返到課室我就發現自己張檯擺0左一張白色信封。我行去睇0下封信﹐原來係一張聖誕卡。我打開張卡﹐入面寫住﹕

            當我睇到0個陣時我係呆0左呀﹐之後轉身搵一搵B0係邊。而坐我隔離0既Cynthia都發現到我張檯有張聖誕卡﹐Cynthia問﹕

「邊個俾你呀﹖」

            我俾張卡佢睇﹐之後佢講﹕

「佢送卡俾你呀﹖」

「不過﹐你睇0下﹐D字好似唔係佢寫喎。」我講

「睇得出咩﹖」Cynthia0係老師唔圍意之下睇張卡講

「睇得出。唔記得呀﹐我同佢一齊做過0野嘛﹐所以見過佢0既字跡0架。」我好細聲咁講

「等一陣俾佢0地睇0下﹐講0下啦。」Cynthia講

            之後我望一望坐我前幾行0既B﹐睇落B好似冇咩0野喎﹐係咪佢送呢﹖我真係有小小壞疑係佢送呢。

            到食晏時間﹐我就俾張卡佢0地睇﹐佢0地不約而同都話係B送俾我。我咪講D字跡唔係佢﹐大家都同意呢一點。

「你估佢會唔會叫人幫佢寫﹐然後俾你呢。」Cynthia講

「點會呢﹖佢唔似呢D人喎。」我講

「又係喎。咁會唔會有人整蠱佢呢﹖」英姐講

「有可能喎。」m&m講

「應該係呀。你睇﹐頭先先講話B係咪鐘意0左miki﹐跟住而家有張聖誕卡俾佢喎﹐重唔係一個大整蠱﹖」JuJu講

「一定有人整蠱我同B呀。」我講

            查實我係咪搵籍口呢﹖因為我唔信B會送聖誕卡俾我。

「咁大整蠱﹖或者有人想撮合你0地喎﹖」英姐問

「撮合﹖」m&m問

「有可能喎。0拿﹗首先0個個人模B0既名寫張聖誕卡俾你﹐之後你見到張卡係佢送就走搵佢問或者講多謝﹐之後佢同miki示愛~~~嗚miki。」JuJu講

「又或者係咁﹐正當miki搵B想講多謝之際發現原來張卡唔係B送﹐之後miki同B一齊去搵兇手。」Cynthia講

            做咩0野佢0地咁好想像力喎﹐我好似聽故事咁聽。

「又或者miki去問B點解會送卡俾佢發現B都想俾張卡俾miki﹐之後兩個就笑一笑就算﹐張無名卡就放埋一二邊呀。」英姐講

「又或者咩呀﹐你0地都幾有想像力喎。」我講

「跟得你多嘛。」m&m講

「我﹖我冇咩想像力喎﹐你0地勁D。」我講

「你勁D。」m&m講

「但係都係冇結論喎。夠竟係唔係B送呢張卡俾我呀﹖」我搖一搖張卡問

「係喎﹐冇結論喎。」Cynthia講

「不如去問B呀﹖」m&m講

「唔好啦0卦﹐我都知張卡唔係佢寫﹐如果去問佢的話……總言之唔好啦。」我講

「驚呀你﹖」英姐問

「我~~其實都幾驚0架。」我講(真係驚0架﹐唔係假0架)

「咁我0地幫你啦﹖」JuJu講

「0下~~~唔好啦。都係唔好問佢呀。」我講

「你唔想查個明白咩﹖你想就咁就算呀。」英姐講

「真相對我0黎講都唔重要﹐有卡咪收囉﹐都係一番心意﹐唔需要計較係邊個送啦。」我講

「miki唔想查就唔好迫佢啦﹐不如算數啦。」Cynthia講

「咁miki唔想知0既話就算啦。或者唔知重好添﹐有幻想嘛。」JuJu講

「係呀﹐可以諗到天馬行空0既故仔囉。」m&m講

「嘩﹗連天馬行空都識﹖」我問

「唔識0架﹐我亂咁講咋。」m&m講

「你咁都得呀﹗」JuJu講

            最後有冇真係去查真相﹖當然冇啦﹐佢0地知我唔想知攪咁多0野所以冇去查明真相。其實張卡一睇就知係一個暗謀0黎0既﹐首先問B佢鐘意邊個﹐然後就以佢名義寫一張聖誕卡俾0個個人。我諗就係咁呀。

            咪住~~~我重未知B係咪鐘意我就下判斷﹐唔通~~~算吧啦(我D想像力都幾豐富喎﹐我諗重犀利過班0野添)。