Chapter 13 ~ We meet again, in the Bus Stop.

第十三章 ~ 巴士站的重遇

 

            中二發生過0既事就講完呀。而家就開始講我0既高中生活呀。其實高中生活都係平平無奇﹐冇初中咁好玩同精彩。到高中就真係要努力讀書囉﹐因為要對負中五0既會考同中七0既大學入學試(香港人所講0既A-Level) 。真係有D唔慣﹐交通方面就係要坐巴士返屋企﹐表姐或者阿哥車我返學。要坐巴士返屋企0既時候﹐我需要花十五分鐘由學校行到去巴士站﹐去到巴士站重有可能會碰到初中0個陣時0既人﹐由其係個班台灣男仔。就0係碰見之前同碰見之後都有段故0架﹐重係幾好笑0既添。點解我咁講﹖

 

            終於上到高中做個真正中學生呀。初中0個陣時玩多過讀﹐而家要努力讀書囉﹐呢個先係中學生應該做0既0野呀嘛。冇班男仔0係度都不知幾開心呀﹐由其係我﹐唔使俾佢0地講。

            中三初頭唔係好慣﹐又要自己行去巴士返屋企﹐坐完巴士重要行一段路先返到屋企﹐如果個巴士司機飛站的話(我要落0個個巴士站算係好明顯0架啦﹐佢夠膽飛站喎) 重要行一條長命斜先返到去﹐所以我每日都有足夠0既運動呀。0係學校﹐上完每一堂之後又要行一段路去第二堂﹐書都有幾本﹐重要差唔多成本字典咁厚喎﹐重有自己寫D notes同先生俾你D notes﹐日日個書包就好似玀一大舊石返學咁。好彩學校有locker﹐可以擺D唔需要做功課或者讀書0既科目就留0係locker度唔帶返屋企﹐幾好呀。

            好呀﹗講返搭巴士先。每日放學﹐我﹐M&M﹐JuJu都會一齊行去巴士站。雖然我0地搭唔同班巴士﹐但係我0地上巴士0既地方都係一樣0既﹐所以每日我0地都約埋一齊行去巴士站。每日去到巴士站﹐除0左我0地學校0既女仔之外﹐重有只係隔一條街0既男校0既學生。其實呢兩間學校D學生大部份都係附近初中學校轉過0黎呢兩間高中。所以我0係初中0個班台灣仔有好大可能去0個間男校。就因為以上0既理由﹐我係有可能會見返我以前初中D同學。

 

            到吃晏時間﹐我0地一大班人搵間課室一齊食晏﹐今日我帶返中二影0既相俾佢0地睇﹐大家都笑住講返中二0個陣時D0野。當然﹐B都係話題之一啦。

「呢張影得幾好喎。」M&M講(佢睇0個張係我最後一日JuJu玀我部相機影到我同B0個張相)

「佢重話0個張相冇咩野﹐又話我個樣好睇﹐先影張相喎。原來係令有目的0既﹐你個死人頭JuJu呀。」我講

「0可0可﹗重唔俾我影到。」JuJu笑住講

「話時話呀﹐唔知B同其他人去0左邊間高中呢﹖」英姐講

「我諗都係0個間男校呀。」我講

「咁有可能會撞到佢0地喎。」Cynthia講

「唔會0卦﹗」我講

「有可能喎﹐miki想唔想見返B呢﹖」M&M講

「佢﹖點解要見佢呀﹖」我問返轉頭

「見到佢咁答﹐佢應該唔想見佢呀。」Cynthia講

「咁~~見佢都無咩所謂。有可能會係巴士站見到佢添。」我講

「我見過佢喎。」M&M講

「你見過B﹖幾時﹖邊度﹖」英姐呢個八妹問

「有日放學0係巴士站就見到佢囉。」M&M講

「0個日我一定唔係度呀。唔係我點會唔知。」我講

「係呀﹐你0個日有人接嘛。」M&M講

「係呀﹗0個日有人接0左我呀﹐真係好彩呀。」我講

「好彩﹖」JuJu問

「唔好彩咩﹖」我問

「真係唔明你呀。」JuJu講

「或者今日真係咁好彩撞到佢呢。」Cyntia講

「係呀﹗今日可能好彩地 0係巴士站見到佢呢。」我講

「你把烏鴉口一講出0黎0既0野都有可能變成真喎。」英姐講

「唔會0卦﹗」我講

「有可能喎﹐你有時講D0野會0係短時間之內發生。可能今次都會……呀。」英姐講

「唔會唔會﹗如果我每次講D0野都會發生的話咁就死呀。」我講

「不過可能會中喎。」M&M講

「中先算啦。」我講

            其實我呢個烏鴉口已經有好長歷史呀。不過唔知點解呢一排每次我話個D咩0野﹐想見到D咩0野﹐就會0係好短時間之內就會出現﹐都幾得人驚0架。我少少懷疑我應該去做預言家呀﹐講咩就中咩﹐真係。

            話咁快到放學呀﹐我0地一班人(我﹐M&M同JuJu) 行去巴士站﹐到巴士站0既時候已經見到好多人0係度等巴士﹐我0地搵到一小空位企0係度等巴士(通常我0地上巴士係唔使排隊0既﹐又唔似香港咁一條隊就搭某號巴士﹐總言之一見到你要坐0個班巴士就一大班人去迫巴士。不過迫還迫﹐迫到差唔多到巴士門口0既時候﹐ D男仔都會讓女仔上車先﹐好有紳士風度0架) 。我0地分別所搭0既巴士重未0黎﹐所以我0地企0係度左望右望等巴士。無意之中見到一個好熟識0既身影行過。

「0個個人咁熟0既﹖」我問

「嘩﹗miki﹐幾個月冇見就唔認得佢呀。」M&M講

「頭先先睇完D相點會唔認得呀。」JuJu講

「0下﹗係B0黎0架﹐認唔到佢添。」我講

「頭先先講開佢﹐而家就出現呀。miki, 你把口真係……」M&M講

「唔係呀嘛﹗咁都中。」我唵住個口講

「0可0可﹗我諗你呢排都係唔好講咁多0野囉。」JuJu講

「我諗我呢排都要封口呀。」我講

            M&M坐既巴士0黎呀﹐我見到B同令外一個男仔(我0地推斷0個個男仔係B0既哥哥﹐因為JuJu聽到B好似有個阿哥同一個阿妹) 一齊準備上車。

「我上車呀。」M&M講

「你同B坐同一架巴士返去喎。」我講

「係呀﹗我聽日話你聽佢0係邊度落車呀。」M&M一路講一路走去上巴士

「M&M真識做呀。」JuJu講

「我冇叫佢咁做喎。」

            自從上次0係巴士站見返B之後﹐我連續幾日都係巴士站見到佢。每次都係坐唔同班巴士走﹐連M&M都攪唔清佢住0係邊﹐而我都冇興趣研究呢D0野。

            又過0左幾個禮拜呀。呢幾個禮拜都冇見到B去巴士站搭巴士。而我都開始封口﹐唔想我D烏鴉口又靈驗呀﹐不過有時都不知不覺咁講0左出0黎(我時常都唔經大腦講0野0架) ﹐真係失敗呀。

            今日如常放學去巴士站搭巴士返屋企﹐當我同M&M一齊行去巴士站途中﹐因為我要去買D0野所以我同M&M就行行0下就分開行﹐我去買0野﹐M&M去巴士站搭巴士。買完0野之後﹐我行到去巴士站等巴士返屋企﹐巴士站重係咁多人等巴士﹐直到我坐0個架巴士0黎﹐佢0地﹐包括我都一窩風咁迫上車﹐但係我迫唔到﹐所以我差唔多係最後上車0既人。上到車當然搵位坐啦﹐坐好個位(我坐0係背住司機坐﹐總言之當架巴士行0既時候﹐我睇到係倒後行啦) 之後﹐我又開始左望右望啦﹐點知道我望到B坐0係我斜對面﹐重0係度望住我添。我開始感覺到我塊面好熱﹐唔通我面紅﹖因為B一直0係度望住我(其實有咩好望呢) ﹐唔臉紅就假呀。之後我就玀一本0係學校借返0黎0既書出0黎睇﹐我想逃避佢D眼光﹐但係一本四份之一A4紙咁大0既書點會完全唵到我塊面呀。所以我將全副精神落0係本書身上(本書有關日本0既0野﹐旅行書0黎) ﹐但係我梗係感覺到有個人望住我﹐好驚呀。短短幾個字車程我都唔咁望佢﹐連自己都唔知點解我會係咁。不過好彩B早落車過我﹐所以見到佢落0左車之後我就鬆一口氣﹐終於走0左呀。我見到佢離開﹐過馬路﹐我好似用隻眼送佢走咁﹐唔好以為我好唔捨得喎﹐少少都冇呀。

            第二日就講呢件事俾班同學聽﹐除0左原本班底(M&M﹐JuJu﹐英姐同Cynthia) 之外﹐重多0左一個新同學﹐佢叫做cool-la-ra﹐佢都係同我0地一間初中轉過0黎。可能初中間學校大啦﹐所以未見過佢都唔出奇(其實我0地冇去識其他班0既人) 。cool-la-ra初初都聽得一頭霧水0架﹐後來我0地講返俾佢聽發生咩0野事(講0既過程之中都有人0係度加鹽加醋啦﹐係邊個﹖你自己估啦﹐你覺得係邊個咪就係邊個囉) 。當然cool-la-ra未見過B啦﹐所以佢0地叫我帶返中二影0既相返0黎學校睇﹐我無所謂呀﹐我咪帶返0黎俾佢0地睇啦。帶返0黎睇又俾佢0地講我所謂情史﹐真係慘呀。

            打後0個幾個禮拜再冇見過B。初頭我都會有D期待0架(都唔知點解) ﹐打後都冇呢D感覺囉。通常唔期待0既0野偏偏有事發生喎。

            中三第一個考試要0黎呀。之前可能太勤力讀書﹐點知讀出個病來﹐又發燒又傷風﹐病到五顏六色﹐0個陣時又要休息又要讀書﹐真係痛苦。好唔容易病好呀﹐但係要考試﹐考試0個日要自己搭巴士返學校考試﹐考完試又要自己搭巴士反屋企(之不過考早試先係咁) 。今日係我第二日考試﹐因為今日考早﹐自己要搭巴士返學校。今日算係過得去啦D考試(通常話過得去﹐但係返0黎D分就~~~)﹐可能自己重未病好啦(可能唔關事呀) ﹐行路零舍慢﹐行到巴士站已經見到我坐0個架巴士已經到巴士站﹐咁我就用九秒九跑過馬路(當時係綠燈可以過馬路0架﹐唔好以為我衝出馬路呀) ﹐跑0既途中我懶係卡通片0個D主角咁返學0個陣時就0黎遲到咁大叫﹕

「遲到呀﹐遲到呀﹗」

            但係好明顯唔關遲到事0既。但係如果我走0左呢班巴士我要等差唔多半個鐘先有第二班﹐我唔想留係度半個鐘(雖然巴士站附近有地方行0下﹐但係我唔想留0係度嘛) ﹐所以跑去巴士站。好彩架巴士重未走﹐我上到巴士見到我學校D人(可能都係考完今日0既試返屋企啦) 同埋男校D人(可能佢0地都考試0卦) 。又因為冇位坐﹐所以只可以企0係巴士入面。我係最後一個上巴士﹐所以個個都望住我﹐可能頭先跑過0黎D動作太大0卦﹐我企好之後先見到一個熟口面0既人﹐0個個人咪就係B囉。又俾我碰到佢呀﹐重要毫無心理狀態之下見到佢喎﹐真係嚇0左我一跳呀。我轉身﹐唔咁望佢呀﹐雖然佢都係企0係巴士入面﹐重係同我隔唔係好遠﹐但係我都唔想望佢。算啦﹐橫掂佢早過我落車﹐由得佢想望我就望我啦﹐因為當時0既我完全諗第二樣0野﹐我懶得理佢呀。

            呢一段巴士重逢片段到中四已經結束﹐可能佢阿哥考到車牌(當時十五歲就可以去考車牌呀) 啦﹐又或者佢屋企人接佢呢﹐總總理由佢唔使搭巴士返屋企。不過﹐唔0黎重好﹐因為~~~~我想忘記佢。點解﹖舊0既唔去﹐新0既~~點0黎呢。

            就係咁﹐B就0係我生活中消失﹐唔知﹐重會唔會返0黎呢﹖(各位﹐有可能會0架)