Chapter 15 ~ We meet again in University

第十五章 ~大學奇遇

            終於上到大學呀﹐個個都好開心。當然我都開心啦。上到大學校唔使晨咁早起身返學﹐遲D起身都得。不過已我呢個成積麻麻既人都上到大學就要辛苦D﹐唔係會好難畢到業囉。上到大學就會識到好多人﹐男男女女﹐不同年紀﹐有機會會撞到我既初戀情人添。我搵唔搵到﹖我算係最失敗既一個呀﹐我識個D男仔唔係已經有女友就係唔合眼緣。到而家差唔多二十三歲重未拍過拖既人黎講可能係一個笑話﹐又可能有人懷疑難係咪有問題。我講明我係冇問題架﹐可能我緣份未到啦﹐又或者自己唔想談戀愛住呢。連自己都唔知點解。但係上到大學俾我見到差唔多有六七年冇見既人。係邊個﹖重有邊個啦。

 

            大學生活真係幾好﹐功課小﹐彈性返學時間﹐每一個學期都有兩個禮拜短假﹐上學期完就放三個禮拜假﹐之後暑假重放差唔多四個月添﹐真係開心。

            初初入到大學D課室好似一個大戲院咁﹐大(大課室) 既去過﹐細(細課室) 都去過。因為大學實在太大呀﹐有時自己都會迷路﹐但係好彩﹐我所上既堂全部都係集中一兩度地方﹐淨係測驗考試先要搵下試場係邊。另外我大學有三個唔同campus(校舍)﹐一個就係市中心﹐第二個就要坐差唔多半個鐘頭(由市中心到另外一個campus)先去到既campus﹐重有一個醫學院添。我有時都要坐半個鐘頭巴士去第二個campus上課﹐其間我都係聽歌﹐睇書黎渡過。

            大學係就係大﹐但係泊車位就小之有小呀。初頭我係等街邊個D免費泊三個鐘頭既車位﹐因為太多人等呢D位呀﹐攪到我成日拍唔到位﹐又遲到﹐重有個度有好多抄牌人員行黎行去﹐見到你係路中心等車位就抄你牌﹐我不下中左招幾次﹐重要罰錢。就因為咁﹐我就搵平價停車場泊﹐好彩都有俾學生泊車既停車場。但係個個停車場爛到阿媽都唔認得(我話個地下呀)﹐但係冇法啦﹐鬼叫個個停車場係全大學最平咩。所以日日都要早D返學”輪位“﹐車位有限嘛﹐遲D返去有可能輪唔到位﹐咁你就要搵其他停車場呀。但係如果你係第二個campus(半個鐘巴士個個)就有免費車位﹐你一定要有一科係果度上堂先可以申請到泊車証。雖然日日都要坐成半個鐘頭巴士先可以玀返架車﹐但係都冇辦法。  

上到大學﹐有好多人話係一個聚舊既地方﹐點解﹖大學話大唔大﹐話細唔細﹐好容易會見返高中或者初中既同學。但係相隔差唔多六年﹐認得到初中同學都話自己叻。你知啦﹐六年喎﹐可能個個人由一個肥仔變左一個高大又靚仔既人。我變成點﹖仍然係一個肥妹﹐長高左D啦﹐帶既眼鏡唔再似小雲﹐著衫追上時代﹐個性由一個得30%男仔頭性格變左一個百份百男仔頭性格既我﹐由淨係鐘意黎明既我變左一個鐘意多個二個男明星既我。呢個就係而家既我呀。

            之前講過會有機會見返相隔六年既舊同學﹐我就試過呀﹐重幾攪笑添。

            0岩0岩開學﹐一定要去買參考書返屋企(D參考書成本字典咁厚﹐買兩本都抬死我)讀。買完要上多一堂先可以返屋企﹐見重有時間﹐我就行去食物部睇下有冇同學係度。行到食物部見到有同學坐係度傾計﹐個同學見到我就叫我過去﹐就係呢個時候﹐我見到一個非常熟識既身影經過我身邊﹐我個心“咚咚(大聲個隻喎) ” 聲﹐跳得非常快。我轉身睇佢身影就心諗﹕

「我係咪識佢呢 ﹖好熟口面喎。」

            我就一面問號咁行去我同學度﹐我同學見到我個樣就問﹕

「做咩呀你﹖」

「冇野呀﹐頭先我見過一個人好面善﹐但係又唔記得邊個。」

「男定女黎架﹖」

「男黎架。真係好熟喎﹐佢係邊個呢﹖」

「佢係咪你舊同學呀﹖」

「唔係呀﹐我高中係讀女校架喎。」

「初中呢﹖」

「初中﹖有可能喎。」

「我聽過你講過你初中係讀男女校呀。」

「係呀﹐可能係我初中同學啦。」

            初中同學﹖可能係啦。我都唔係點認得呀。

            上完今日最後一堂就行去停車場玀車返屋企﹐係行去停車場既時候﹐行係我前面0個個人咁熟既。原來係我頭先話可能係我初中同學0個個人。我就係度諗﹕男仔﹐初中同學﹐個樣好似幾黑﹐又帶眼鏡﹐諗諗下我就諗到一個名字~~B。初中個陣時話係我鐘意既人﹐唔通真係佢﹖有可能喎。

            我玀住兩本字典咁厚既書慢慢行入停車場玀車﹐我架車就泊係一條斜路上面﹐咁我就慢慢行上去啦。你知啦﹐D書咁重﹐自己個袋又重﹐真係重上加重呀。我見到行我前面0個個人行0左我隔離條線泊車區﹐因為我泊呢個停車場係露天﹐只係用鐵油桶黎分區泊車﹐所以睇到佢泊係邊同佢架車係點樣。終於行到自己架車度囉﹐原來佢泊係我前我兩架車既車位﹐個陣時個兩架車己經“吉”左出黎﹐所以佢見到我架車係點樣。正當我擺成兩舊磚咁重既書同自己個袋係車度(司機位隔離) 既時候﹐我見到佢係度望住我架車﹐呆左個隻。我就諗﹕

「我架老野車有咩好望呢﹖唔通……佢真係B。」

我記得佢見過我架車喎(係時候講下我呢架車既歷史呀。我而家呢架車係我移民到紐西蘭個陣時已經買呀﹐都有十幾年歷史呀。由初頭我阿哥駕﹐而家到我)﹐因為初中個陣時阿哥都有車我返學﹐係學校門口都見到佢喎。所以﹐就係種種理由之下﹐我確定﹐佢~~~一定係B。哈﹗佢變靚仔左喎﹐但係重仍然咁黑﹐可能佢天生係咁黑啦。佢就係第二個人既吹速之下﹐個眼神離開我同我架車。而我就懶係冇野咁上車返屋企。唔知佢認唔認到我呢﹖

            學校既食物部係我同我D同學成日去既地方﹐除左我地之外﹐重有其他人都鐘意去個度。今日約左同學食晏﹐去到食物部搵位等我同學啦﹐搵到位就坐低等我同學。冇野做開始望黎望去。望望下又見到B同佢D同學黎食物部﹐我發現﹐除左佢D男性朋友之外﹐重有女性朋友(我諗係女性朋友﹐因為有兩個女性朋友)﹐樣貌都算OK﹐之不過個身形就……同我差唔多。佢而家識D女性朋友都咁既樣﹐咁佢個女友咪……好好睇﹖我諗。一定係呀﹐佢咁靚仔﹐一定一個靚女朋友呀。之後發覺我個袋震下震下﹐我諗我手提電話響(轉震機)啦。之後係個袋度玀個電話出黎睇下邊個打黎﹐原來唔係我電話係度震﹐而係其他人個電話響。我見我D同學重未黎﹐我就玀住個手提玩起上黎﹐玩玩下就有一個人企係我隔離﹐我諗個個人係度等位啦﹐所以我冇裡佢。之後個個人講左一句說話﹕

「你係唔係miki呀﹖」佢用唔鹹唔淡既廣東話講

            我抬高頭望﹐原來係…….我起身望住佢﹐原來係上次係停車場睇住我部車睇到入神既人。

「係呀﹗你係……B﹖」我唔係咁確定﹐問下好D

            B佢點一點頭﹐笑左一下。

「哈﹗好久唔見呀﹖」我又用我D唔鹹唔談既國語同佢講

「係呀﹗你D國語都講得幾好啦。」

「我只係講兩句就話幾好。相反你D廣東話講得幾好喎。」

            講完之後我地兩個都笑起上黎﹐唔知點解會笑呢﹖笑完後就聽到B既同學係遠方叫佢﹐我諗佢都要返去呀。

「你朋友叫你喎。」我拍一拍佢叫佢望佢同學個邊

「係喎﹐我要返去呀。俾你部手提我呀。」

            我唔係好明點解佢要我部手提電話做咩野﹐不過佢叫到就俾佢啦。佢係我手提電話度打佢手提電話號碼﹐之後俾返部機我。

「呢個係我手提電話號碼﹐得閒打電話俾我啦。」

「哦﹗好呀﹗我都俾我電話號碼俾你啦﹐你部手提呢﹖」

            B玀部手提電話俾我入我自己既手提電話號碼﹐之後俾返個電話俾B個陣時發現佢個電話貼左張貼紙相﹐張相係佢同一個女仔一齊影。唔通係佢女朋友﹖問下佢先。

「你女朋友呀﹖」我指住貼住電話個張貼紙相問

「佢……呢個…….其實係我細妹黎架。」答得咁吞吞吐吐既

「你個妹﹖睇落都唔似兩兄妹既﹖」我係咪講得白得滯呢

「好多人都咁話﹐但係佢真係我個妹黎架。」佢講到“真係” 明顯用好重音黎講

「咁我又唔係唔信你。你真係要走呀﹐你睇﹐你D朋友叫你呀。」

「係喎﹗我走呀﹐遲D見啦。」

            B就係咁返去佢D朋友度。而我同學就係呢個時候黎到﹐佢見到我同一個男仔傾計就開始問我同佢係咩關係﹕

「佢係邊個黎架﹖」

「佢﹖哦~~~佢係我初中既舊同學黎呀。」

「舊同學﹖幾好睇喎。」

「呀呀~~~~係呀係呀~~~~~」

            我心諗“好睇咩﹖”

            之後點﹖其實都冇咩事發生啦。我地有時通下電話﹐有時出去食晏﹐我地好似朋友咁。有冇進一步發展﹖其實就~~~~~唔知呢。唔講俾你聽。哈哈﹗

            一個故事最終都會有終結。對我黎講﹐入到大學之後就開始我另外一個故事﹐係好係壞﹐連自己都唔知。我淨係知道之後既故事一定係好開心。你既故事又係點呢﹖我諗一定同我一樣咁精彩﹐係唔係﹖