Chapter 9 ~ Lover's Action

第九章 ~ 灑花槍

你一句﹐我一句﹐之後個女仔就撒嬌同個男仔講0野。其實我係唔鐘意呢D場面﹐硬係覺得呢D場合唔係咁識合我。我從來都冇同人撒嬌﹐我由冇咁0既需要做呢D0野。但係有一D人誤用撒嬌或者同第二個人灑花槍(都冇人俾我灑﹐如果有就好呀) 。

其實有好多人都會誤用撒嬌同灑花槍。由其係中文水平差0既人﹐唔知呢個名詞講咩就玀0黎用。我D同學就係咁呀﹐當然﹐小女子0個陣時重未知灑花槍0既真正意思。所以我都係由得佢0地講。之後我知道點解我先發覺佢0地發生所謂灑花槍﹐根本兩會事。唔信﹖睇落去啦﹗

 

            自從我同B做0左張poster後﹐唔知做咩0野﹐次次有分組上堂或做0野都有同佢一齊。重俾班0野(同學們)話我同佢仍影不離喎。大佬呀﹗我都唔想0架﹐咁先生鐘意我0地一組嘛﹐冇法0架。

            除0左話仍影不離之外﹐重有灑花槍。點灑﹖話說今日要玩一個遊戲﹐呢個遊戲係有一個人背住我0地坐﹐老師就選一個人扮聲講一句說話﹐咁要背住我0地坐0既人估邊個扮聲同佢講頭先0個句說話。估中就可以留低繼續玩﹐估錯就out。其實呢個遊戲都幾好玩啦﹐又考你聽覺能力同扮聲0既能力。

            遊戲玩到中間0既時候老師叫我扮聲令到估0個個人估唔到我﹐所以到我上去坐做估0個個人。第一個我估到﹐第二個都要扮聲0個個人講多一次先估到。第三個啦喎。第一次聽只係聽到係邊面傳0黎﹐聽唔到係邊個﹐所以要0個個人再講多一次。講完之後我就轉身(其實係可以轉身睇0下邊個個樣有咩0野冇同就知道邊個啦)睇0下邊個神情有唔同。望望0下見到B佢個樣有D唔對路﹐我諗係佢囉。之後我就講B就係扮聲0既人﹐最後我都估中。唉﹗B0的戲真係差呀﹐咁都俾我估到﹐真失敗呀。佢有咩反應﹖笑0左一下就算呀。

            到佢做估0既時候﹐我就衝大頭鬼話我要做扮聲0個個等B估。自問我D扮聲功夫都幾掂0架。B聽0左之後都估唔到係邊個扮聲﹐除0左把聲之外﹐戲都要做得好先得。我D戲一樣做得好掂0架﹐所以B估唔到係小女子扮聲囉。估唔到就要開估啦﹐正係B傳身之際﹐我已經用「V」字手勢話扮聲0既人正是在下。B見到係我0個陣我見到佢個樣係呆0左一陣﹐之後就笑一笑就了事呀。不過﹐0係我做「V」字手勢0既時候﹐我已經見到有兩對眼望住我咪咪嘴咁笑。係邊個﹖重有邊個啦﹐咪係JuJu同英姐囉。Cynthia去0左邊﹖佢病0左冇返學所以睇唔到囉。

            0係食晏0既時候﹐英姐急不及待就講頭先玩遊戲D0野俾m&m聽。

「嗚﹗你0地兩個好似灑花槍喎。」m&m講

「咩呀﹗緊係唔係啦。你究竟知唔知“灑花槍” 係咩0野意思呢﹖」我問

「知~~~當然知啦。」m&m講

            但係我睇得出佢講大話啦。

「真係﹖」我再問

「我睇電視劇學返0黎嘛。」m&m講

            算啦﹗佢都話知點解就唔好踢爆佢呀。

「算啦﹗總言之我頭先唔係同佢灑花槍啦。」我講

「唔係喎﹐真係似喎。」英姐講

「呢D邊算呢。」我講

「算呢。」m&m講

「唔係呢。」我堅持咁講

「係呢。」英姐講

            之後我0地好似嗌交咁嗌我頭先我同B玩遊戲0既時候係咪灑花槍。結果係點﹖係~~~冇結論0既﹐好0野呢。

            今日PE堂(體育堂)玩捉人遊戲。點捉﹖首先分0左兩組﹐一組做捉人﹐令外一組當然做被捉啦。做捉人0個隊會排成一條直線﹐每一個人博到博企﹐面向一邊﹐令外一個就面向令外一邊(一個望前面﹐一個望後面)。如果被捉0既人跑0左去令外一邊而做捉0既人見到自己0既隊友企0係有利位置﹐咁就可以用你隊友繼續捉人﹐只要掂一掂(拍一拍都得)你隊友就得呀﹐但係有定要你0既隊友面向你要捉0既人0既方向先得。

            睇落都幾好玩﹐不過玩0既時候跑0黎跑去都幾辛苦0架。講完遊戲0既玩法就開始玩呢個遊戲呀。

            今次好彩地唔使同B一組。不過我覺得有D不安0既感覺﹐我都唔知點解。重未到我玩0既時候(因為係一個捉一個)﹐見到就覺大事不妙呀﹐一個追一個﹐避佢都幾難喎。不過唔係擔心呢樣﹐其實我擔心自己跑唔到咁快﹐你知啦﹐肥人跑唔到咁快嘛。

            話咁快差唔多到我啦喎﹐睇到佢0地都玩得咁開心咁落力﹐攪到我唔落力玩號似唔係咁好咁。終於到我呀﹐我跑入去捉人範圍﹐捉我0既人開始跑過0黎捉我﹐當然我就週圍走唔俾佢捉啦。0個個人拍一拍B﹐B係非常近我企0既地方。嘩﹗我重唔雞飛狗走﹐當然佢一直係咁捉到﹐正當B捉到我0既時候(應該係拍到我0既時候)我嗌0左出0黎﹐「呀」一聲。我唔係俾佢嚇親﹐其實係佢拍得我0既時候拍得好大力﹐攪到我嗌0左出0黎。阿B哥哥﹐需唔需要咁大力呀﹐我係你仇人咩。真係。

就係咁﹐玩0下玩0下又差唔多上完PE堂﹐係時候返課室換衫。返到課室(變0左做女更室) ﹐JuJu佢0地又開始講頭先玩0個陣時D0野﹕

「頭先我差少少被佢捉到呀﹐好彩我閃得快咋﹐唔係~~~」JuJu懶叻咁講

「你頭先跑得咁快﹐邊有人捉到你啦。」英姐講

「miki都跑得快呀﹐但係都俾B捉到啦。」Cynthia講

「你咪話呀﹐B都跑得幾快呀﹐三兩下手勢就捉到佢呀﹐幾叻呀。」JuJu講

「話時話呀﹐miki你係咪突登被B捉0架﹖」英姐問

「miki都唔係呢D人0黎﹐唔好咁話佢啦。」Cynthia講

            佢0地講講0下發現小女子一粒聲都冇出過聲﹐大家都覺得奇怪。所以佢0地問我﹕

「miki你冇0野呀﹖」JuJu問

「0個個死人頭呀﹐頭先捉我0既時候已經跑到嗌救命啦﹐差唔多尾0既時候個死人頭一手拍落我後面﹐痛到我呀。」我一口氣講0西出0黎

「嘩﹗黑面神真係拍得你好打力呀﹖」JuJu問

「你自己都睇到啦﹐大力到死﹐真係。」我帶點激氣咁講

「你好火喎。」英姐講

「緊係啦。你試0下俾佢拍0下呀﹐都唔知有冇個血掌印0係我身度呀。」我開始0係度上查0下有冇血掌印

「有冇咁誇張呀你。」JuJu講

「頭先我見到黑面神真係拍得好大力呀。」Cynthia講

「佢點會咁樣對miki0架﹖佢唔係……」英姐講

「講咩呀﹖」我講

「冇0野呀。你冇0野就真呀﹖」JuJu講

「放心啦﹗冇事呀。好彩我D肥膏夠厚咋﹐真係。」我講

「硬係覺得B唔會咁0架。呀---你0地兩個0係度灑花槍呀﹖」英姐講

「如果咁灑法都幾恐怖喎。」Cynthia講

「灑你個頭呀。求0下你0地唔好再講啦好唔好呀。」我已經換好校服同佢0地講

「好啦好啦﹗唔講呀。」JuJu講

            不過﹐到食晏0既時候~~~~

「miki﹐你頭先又同B灑花槍呀﹖」m&m講

            唉﹗呢D係唔係唔衰玀0黎衰呢。我有咩反應﹖冇反應喎﹐應該話冇佢咁好氣就真。